عام

ابني غبي يا جماعة…. الحقوني

انا كنت محضرة موضوع تاني تماما بس حصل موقف استفزني جدا و خلاني ادخل اكتب.. امبارح دخلت منتدى محترم مهتم بالتربية و فيه أم بتسأل:

هو انا ام فاشلة ولا ابني هو اللي غبي؟؟؟؟؟

و احب اني ارد عليها هنا و اقولها ” لا يا حبيبتي انتي اللي فاشلة

مقصدش اكون قليلة الذوق و الله بس فكرة ان أم تشتم ابنها دي بتعصبني جدااا و خصوصا انه طفل و معروف ان كل الاطفال اذكياء بس هي المشكلة ان احنا مش عارفين غير نوع واحد بس من الذكاء و هو التحصيل الدراسي

زي برضه ما احنا بنقول على الولاد اللي قاعدة طول النهار مش بتنطق ولا كلمة و مكتفة ايديها مؤدبة… و الادب لا يعني اي شيء في ذهننا غير قلة الكلام و عدم الرد على اي حد

لكن لو طفل عايز يناقش و يفهم يبقى لمض و بجح و قليل الادب

مااااا علينا… نرجع لموضوعنا

ببساطة الام اللي بتقول على ابنها غبي دي و ناشرة الكلام دة عالنت ” و اكيد طبعا بتغنيها و تلحنها للولد المسكين في البيت طول النهار” هي كدة بتقتل ثقته في نفسه و بتخليه يستسلم بسهولة ادام اي عقبة تقف في طريقه

و لما تقابله مشكلة مش هيحاول يحلها، لييييييييييييييه؟؟؟ عشان ماما دايما بتقول اني غبي، يبقى انا مش هعرف اتصرف و لا احل أي حاجة بنفسي

يا جماعة يا ناس يا خلق هووو، الام و الاب المفترض ان هما الناس الوحيدين اللي بيحبوا اولادهم من غير اي حاجة فتخيلوا لما الام تشتم ابنها بقسوة كدة، يبقى اكيد هو هيفكر ان فيه حاجة غلط

لازم كلنا نتعلم نكون في ضهر ولادنا… مش بقول ايدا نفضل نبجل و نمدح فيهم لكن لما نلاقيهم واقعين في مشكلة نساعدهم على الحل و نشاورلهم على الطريق و نسيبهم يجربوا بنفسهم عشان ميتحولوش لأغبياء فعلا

انا أم و عارفة اننا ساعات بنتعب و نزهق و بدل ما نحاول نوصل الموعلومة لاولادنا بطرق مختلفة بنكسل و نقول هما اللي أغبياء

انا عارفة اني طولت عليكم بس اسمحولي اختم بقصة كل اللي يعرفوني سمعوها مني 100 مرة

طبعا كلكم عارفين اديسون المخترع العظيم بس يا ترى حد فيكم يعرف الست أم اديسون؟؟؟

الست دي جالها جواب استدعاء ولي أمر من اللي لما بنشوفه بنقوم نضرب عيالنا علطول من غير ما نعرف ليه ولا في ايه بالظبط

المهم لما راحت المدرسة قابلها المدرس و قالها ابنك اترفد من المدرسة خديه البيت و انصحك انك متحاوليش توديه مدرسة تانية و علميه حرفة يستفاد بيها علشا “ميئوس منه”.

فعلا هي خدت الولد البيت بس لا ضربته و لا عملت حاجة و علمته بنفسها في البيت و كبر و بقى اديسون اللي اخترع المصباح و اختراعه دة هو السبب ان في نت دلوقتي بنتكلم من خلاله

اديسون حاول 999 مرة لحد ما وصل لطريقة عمل المصباح الكهربائي و يمكن تعتبروني ببالغ لو قلت انه جاب الاصرار دة من امه اللي علمته اهم درس في حياته ” خليك واثق في قدراتك و لو حاجة منجحتش جرب طريقة تاني”

حاولوا تتخيلوا معايا لو ام اديسون دي ست تقليديه و ودته يشتغل صبي ميكانيكي كان العالم بقى فين دلوقتي؟؟؟

الخلاصة حبوا ولادكم و ساعدوهم يجبوا نفسهم و لو عندهم قصور في حاجة ساعدوهم يعدوه و يلاقوا الحاجة اللي هما متميزين فيها

 

 

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s